Hverfið okkar í nærmynd

Hugmyndin snýst um að nemendur kynni sér Grafarvog frá mörgum hliðum og framleiði kynningarefni með kvikmyndaupptökum og hlaðvarpi. Hlaðvarp getur til dæmis verið viðtöl við eldri íbúa um Grafarvog, viðtöl við listafólk, íþróttafólk eða aðra íbúa Grafarvogs sem áhugavert er að kynnast. Nemendur taka viðtöl við fólk af ólíkum uppruna og fengið innsýn inn í ólíkan menningarheim. 

Kvikmyndatökur eru meðal annars af náttúru og lífríki, upphaf byggðar í Grafarvogi, ungmennafélagið Fjölni, félagsstarf, leiksvæði og önnur skemmtileg svæði, menningarstarfsemi og starfsemi  í hverfinu. 

Lagt er upp með að skipta Grafarvogi upp í svæði og nemendahópar greini sitt svæði út frá því hvað er til fyrirmyndar, hvað er til staðar og hvað þau telja vanta. Hóparnir koma með tillögur um úrbætur. Í framhaldi gera þau kort af Grafarvogi sem sýnir staði í Grafarvogi sem vert er að skoða. Á kortinu verða tenglar á kynningarmyndbönd um svæðin. 

Hugmyndin er að nemendur kynni sér hverfið á dýptina og að afraksturinn verði sýndur sem kynningarefni fyrir íbúa til dæmis á barnamenningarhátíð eða á samsýningu allra. Verkefnið byrjar sem hluti af þróunarverkefni þessara þriggja skóla en getur haldið áfram um ókomin ár. 

Menntastefna Reykjavíkurborgar til 2030

Menntastefna Reykjavíkurborgar byggir á grunnstefjum Barnasáttmála Sameinuðu þjóðanna um að menntun barns skuli beinast að því að rækta persónuleika, hæfileika og andlega og líkamlega getu þess. Tilgangurinn er að búa börn undir að lifa ábyrgu lífi í frjálsu samfélagi í anda skilnings, friðar, gagnkvæmrar virðingar, mannréttinda og vinsemdar. Ríkur samhljómur er með mennta- stefnunni, aðalnámskrám leik- og grunnskóla og núgildandi stefnum skóla- og frístundasviðs og Reykjavíkurborgar. Uppeldi og menntun barna og unglinga er samfélagslegt verkefni og á sér stað bæði með formlegum og óformlegum hætti.

Menntastefnan byggir á fimm grundvallarþáttum: félagsfærni, sjálfseflingu, læsi, sköpun og heilbrigði.

Meginmarkmið stefnunnar er að öll börn vaxi, dafni og uni sér saman í lýðræðislegu samfélagi sem einkennist af mannréttindum og virðingu fyrir fjölbreytileika mannlífs.

Unnið verður að því að öll börn hafi sterka sjálfsmynd, trú á eigin getu og nái árangri. Börnin lesi sér til gagns og gamans, afli sér þekkingar og öðlist skilning á samfélagi og náttúru. Þau sýni frumkvæði, skapandi og gagnrýna hugsun og tileinki sér heilbrigðan lífsstíl.

Verkfærakista

Verkfærakistan er safn verkefna sem eiga að styðja kennara í að framfylgja menntastefnu Reykjavíkurborgar.